गोमंतकीय स्त्री लिखित कविता ग्रंथासगोवा मराठी अकादमीचा पुरस्कार

पणजी, ता.‌ 

गोवा मराठी अकादमीचे साहित्य पुरस्कार जाहीर झाले असून, संपादित ग्रंथ विभागात गोमंतकीय स्त्री लिखित कविता २००१ ते २०२० या चित्रा प्रकाश क्षीरसागर व डॉ. नीता तोरणे संपादित प्रातिनिधिक कविता संग्रहास एस. एस. नाडकर्णी स्मृती पुरस्कार जाहीर झाला असून रविवारी २२ सप्टेंबर रोजी दुपारी ३ वाजता तो समारंभपूर्वक प्रदान करण्यात येईल.

या ग्रंथात गोव्यातील नामांकित व नवोदित २३ कवयित्रींच्या प्रत्येकी दहा अशा २३० कविता आहेत.

या ग्रंथाला श्रीकृष्ण अडसूळ यांची प्रदीर्घ प्रस्तावना आहे.  दहा हजार रुपये रोख, सन्मानचिन्ह असे या पुरस्काराचे स्वरूप आहे. महाराष्ट्र साहित्य परिषद पुणेचे अध्यक्ष व कथाकार मिलिंद जोशी यांच्या हस्ते वास्को येथील रवींद्र भवनात हा पुरस्कार विजेत्यांना प्रदान करण्यात येणार आहे. यावेळी मराठी अकादमीचे अध्यक्ष अनिल सामंत उपस्थित राहणार आहेत.

या पुरस्कारांसाठी कथा, कविता, चरित्र आदी प्रकारातील ४७ पुस्तके आली होती.

चित्रा क्षीरसागर या कवयित्री व संपादिका आहेत. त्यांचा कवितेचे झाड हा कविता संग्रह प्रसिद्ध आहे. कविता रसग्रहणावर आधारित संग्रह तसेच प्रातिनिधिक कथासंग्रह, दोन लेखसंग्रह प्रकाशित झाले आहेत.

नीता तोरणे पेडणे येथील संत सोहिरोबानाथ महाविद्यालयाच्या मराठी विभाग प्रमुख आहेत. त्यांचा तीन भाषांमध्ये कविता संग्रह प्रसिद्ध आहे. 

गोमंतकीय ज्येष्ठ मराठी साहित्यिक प्रा. नारायण महाले व कणकवली येथील प्रा. मोहन कुंभार यांनी काम पाहिले.

त्यांच्याशिवाय अरुण नाईक, संदीप मणेरीकर, भावार्थ मांद्रेकर, गजानन देसाई, दीपक प्रभुदेसाई, अजित पैंगीणकर प्राची जोशी आदींनाही अकादमीचे पुरस्कार जाहीर झाले आहेत.