*गणपती बाप्पा मोरया*

सुखकर्ता दुःखहर्ता वार्ता विघ्नाची

या ओळी ऐकल्या म्हणजे आपोआप बाप्पा मोरयाची साजिरी सुंदर मूर्ती डोळ्यासमोर येते. अशावेळी मनाला होणारा आनंद हा शब्दात व्यक्त करणे कठीण. प्रत्येक महिन्यात संकष्टी चतुर्थी व्रताच्या निमित्ताने बाप्पाच्या दर्शनाने मन प्रफुल्लित, प्रसन्न होणे म्हणजे काय असतं ते स्वतः अनुभवणे गरजेचे असते.

प्रत्येकाला आपापल्या घरी विराजमान होणाऱ्या बाप्पा मोरयाविषयी वाटणारी ओढ, जिव्हाळा अगदीं अवर्णनीय.  ६४ कला आणि १४ विद्या यांचा अधिपती असलेल्या लाडक्या बाप्पाच्या स्मरणाने भक्तांच्या मनाला एक विशेष ऊर्जा आपोआप प्राप्त होते.

शिव पार्वतीचा लाडका सुपुत्र गणपती बाप्पा लहान थोर सर्वानाच आवडतो. लाल रंगाची जास्वंद फुले, हिरव्यागार दुर्वा आणि चविष्ट असे उकडीचे मोदक असा असतो बाप्पाच्या पूजेचा थाट.

प्रत्येक नवीन कार्याच्या शुभारंभाला प्रथम पूजेचा मान श्री गणेशाला दिला जातो. शुभ आशीर्वाद प्राप्त होऊन पुढचे सर्व काही मंगलकारक व्हावें, हा त्यामागचा हेतू असतो. श्री गणेश ही देवता बुध्दीची, सिद्धीची असल्यामुळे अभ्यासात देखील गणरायाचे साह्य मिळावे यासाठी विद्यार्थी मनोमन मोरयाची प्रार्थना करतात.

गणरायाच्या आगमनाची उत्सुकता प्रत्येकाला असल्याने अनेक दिवसापासून गणेश चतुर्थी उत्सवाची जय्यत तयारी सुरू होते.

सर्वत्र आनंदाचे वातावरण तयार झाले म्हणजे गणेश चतुर्थी लवकरच येत असल्याची खात्री होते.

वर्षभराच्या कालावधीत गणरायाचे दर्शन घेऊन प्रत्येक भक्त आपापल्या परीने जरी संवाद साधत असला, तरीही घरी विराजमान होणाऱ्या बाप्पाच्या दर्शनाने नव्या दिवसाची होणारी सुरुवात मन प्रफुल्लित करणारी असते हे विशेष.

जगण्याचे बळ प्राप्त करून देणारा गणपती बाप्पा मनोमन प्रार्थना केली,  म्हणजे नक्की ऐकतो, समजून घेत असतो.  प्रत्येकाला मानसिक बळ आधार मिळवून देण्याचे सामर्थ्य मोरयाच्या नावात असते हे सांगायला नकोच.

गणपती अथर्वशीर्ष स्तोत्र मंत्र उच्चाराने मनात असलेला कुविचार, दुःख दूर होण्यासाठी मदत होते. गणपती बाप्पाची कृपादृष्टी ही गोष्ट खरी म्हणजे शब्दातून व्यक्त करण्यापेक्षा ती स्वतः अनुभवणे आवश्यक आहे.

साखरेची गोडी जशी स्वत: चाखल्या शिवाय समजत नाही, त्याचप्रमाणे गणरायाच्या दर्शनाने मिळणारा आनंद स्वतः अनुभवून पहावा लागतो. 

 

मुषकाचे वाहन छान

 डोळे इवले मोठे कान

माझ्या लाडक्या बाप्पाला

पहिल्या पूजेचा मान 

प्रत्येकाला नवीन ऊर्जा मिळवून देणारा देव म्हणजे

गणपती बाप्पा मोरया 

*सचिन पाटील*

*(अलिबाग रायगड)*