शब्द माझे तुझ्याचसाठी " आणि "मयूरस्पर्श " प्रकाशित

 

 

    उत्तोमत्तम कथा कवितासंग्रह निर्माण करणाऱ्या  साहित्यसंपदा प्रकाशनातर्फे  कवयित्री अश्विनी सचिन बोलके यांचा 'शब्द माझे तुझ्याचसाठी' हा काव्यसंग्रह तसेच कवी मयूर महादेव पालकर यांचा 'मयूरस्पर्श' हा चारोळीसंग्रह नवीन पनवेल येथील अभियंता भवन, आकुर्ली येथे प्रकाशित झाला. पुस्तक प्रकाशन सोहळ्यास अध्यक्ष म्हणून ज्येष्ठ साहित्यिक - सुप्रसिद्ध गझलकार ए.के. शेख तसेच प्रमुख मान्यवर म्हणून अखिल भारतीय साहित्य परिषद कोकण प्रांत अध्यक्ष - ज्येष्ठ पत्रकार श्री. दुर्गेश सोनार, कवयित्री,शिक्षिका सौ.मानसी नेवगी, साहित्यसंपदा संस्थापक वैभव धनावडे आणि सबोर्डीनेट इंजिनीअर असं असोशिएशनचे अध्यक्ष संजय ठाकूर आणि इतर मान्यवर  उपस्थित होते. 

सदर मान्यवरांच्या आणि कुटुंबातील सदस्यांच्या हस्ते 'शब्द माझे तुझ्याचसाठी' आणि 'मयूरस्पर्श' या पुस्तकांचे अनावरण केले गेले. कवयित्री अश्विनी बोलके आणि मयूर पालकर यांनी आपले मनोगत व्यक्त केले. बुगटे आलूर ग्रामस्थ संस्थेच्या कार्यकारी मंडळातील सक्रिय कार्यकर्ते संजय पालकर यांनी कवयित्री अश्विनी बोलके यांच्या पुस्तकाला शुभेच्छा दिल्या तर  पल्लवी काळे यांनी 'शब्द माझे तुझ्याचसाठी' या पुस्तकातील 'ऋणानुबंध' ही कविता सादर केली. कवयित्री हिरकणी गीतांजली वाणी यांनी 'मयूरस्पर्श' चारोळीसंग्रहास शुभेच्छा दिल्या तर कवयित्री प्रियंका कोठावदे आणि कवयित्री रजनी येवले यांनी 'मयूरस्पर्श' चारोळीसंग्रहातील काही निवडक चारोळ्या सादर केल्या.  दुर्गेश सोनार यांनी कवयित्री अश्विनी बोलके यांच्या 'शब्द माझे तुझ्याचसाठी' या पुस्तकाबद्दल,"या काव्यसंग्रहातील कविता सकस, सशक्त आणि सामर्थ्यशाली आहेत तसेच हा काव्यसंग्रह असला तरी संपूर्ण पुस्तक वाचून पूर्ण व्हायला दोन ते तीन महिने लागू शकतात,इतक्या त्या विचार करायला लावणाऱ्या आहेत." असे बोल व्यक्त केले. "मनास होणारा भावनांचा तरल स्पर्श म्हणजे मयूरस्पर्श", अशा शब्दांत कवयित्री मानसी नेवगी यांनी चारोळीकार मयूर पालकर यांच्या 'मयूरस्पर्श ' विषयी आपले मनोगत व्यक्त केले.जेष्ठ  साहित्यिक आणि सुप्रसिद्ध गझलकार सन्माननीय ए. के . शेख यांनी आपल्या अध्यक्षीय भाषणात कवयित्री अश्विनी बोलके आणि कवी मयूर पालकर यांच्या साहित्यिक वाटचालीसाठी शुभेच्छा दिल्या आणि 'शब्द माझे तुझ्याचसाठी' आणि 'मयूरस्पर्श' या पुस्तकांचे प्रकाशन झाले असे जाहीर केले.कार्यक्रमाचे सूत्रसंचालन स्मिता हर्डीकर ह्यांनी करून कार्यक्रमाची रंगत वाढवली.सचिन बोलके ह्यांनी आभार प्रदर्शन करून कार्यक्रमाची सांगता झाली.