स्वारगेट (पुणे) बस स्थानकातील गैरसोयी मुळे प्रवाशी त्रस्त तर महाराष्ट्र परिवहन महामंडळ मात्र मस्त.

भारत कवितके मुंबई कांदिवली पश्चिम.

महाराष्ट्र राज्यात मध्यवर्ती समजले जाणारे बस स्थानक स्वारगेट (पुणे) बस स्थानक परिसरात गैरसोयी मुळे प्रवाशी वर्ग त्रस्त झालेला असून तेथील महामंडळ प्रशासन मात्र मस्त असल्याचे दिसून येते,या बस स्थानकात मोटार सायकल,चार चाकी वाहने, रिक्षा,बस स्थानक च्या डाव्या व उजव्या बाजूला अस्ताव्यस्त लावलेल्या आढळून येतात, साहजिकच बाहेरुन येणाऱ्या बसेसची कोंडी होते,बस स्थानक च्या प्रवेशद्वारा जवळ आत पर्यंत रिक्षाच्या रांगा लागलेल्या असतात.येथून आत येणाऱ्या बसेसना अडथळा निर्माण होतो व स्थानका बाहेर बसची रांग लागली जाते व वाहतूक कोंडी होते.प्रवाशांना पायी चालत बस स्थानकात प्रवेश करताना अडचण निर्माण होते.बस स्थानका बाहेर पार्किंग ची सोय नसल्याने प्रवाशांना सोडायला आलेल्या चार चाकी वाहनाची गर्दी येथे दिसून येते, साहजिक बस स्थानकात वाहतूक कोंडी निर्माण होते.बस स्थानकातील वेड्या वाकड्या जागेमुळे मुक्कामाला बाहेरुन आलेल्या बस अस्ताव्यस्त लावलेल्या असतात.शेड क्रमांक २५ ते २८ नवीन सुरु करण्यात आले असून रात्री तिथे मुक्कामी आलेल्या बसेस अस्ताव्यस्त लावल्या असल्याने शेड कडे प्रवाशी जात नाहीत,व बसेस सुध्दा जात नाही.वाहतूकीची कोंडी मुळे बाहेर रस्त्यावर बसेस उभ्या करून काही बस कंडक्टर बस स्थानकात येऊन प्रवाशांना बस कडे घेऊन जातात, प्रवाशांना जड सामान बाहेर बसकडे घेऊन जाताना खूपच त्रास सहन करावा लागतो.खाजगी वाहनाचे दलाल स्वारगेट बस फिरुन प्रवाशांना खाजगी वाहनाने पुढील प्रवासासाठी घेऊन जातात.पावसाळा नसतानाही तेथील तुटलेल्या गटाराचे पाणी बस स्थानकात ठिक ठिकाणी जमा होते, बाहेर गावाहून बस या स्थानकात आणणे व तेथून बाहेर पुढील प्रवासासाठी जाणे म्हणजे चालकांच्या दृष्टीने तारेवरची कसरत असते.प्रवाशांना बसण्यासाठी बस स्थानकातील बसण्याच्या जागेवर तेथे भिकारी, गर्दुल्ले,दारुडे, बेवारस लोक बसलेले असतात.प्रवाशांना बसायला जागा मिळत नाही.महामंडळाचे सुरक्षा रक्षक ड्युटीवर असताना ही याकडे जाणून बुजून दुर्लक्ष करतात.रात्रीच्या वेळी बस स्थानकात आली की शेड समोर उभी न करता समोरच उभी करतात.बस कोणती आहे हे पाहण्यासाठी प्रवाशी बस समोर गर्दी करतात व पुन्हा विखुरले जातात.प्रत्येक बस स्थानकात आल्यावर असे घडते.यामध्ये लहान मुले, महिला, वृध्दांना खूप त्रास होतो.महामंडळाने या स्थानकातील खाजगी वाहने, खाजगी दलाल, रिक्षा वाले, भिकारी, गर्दुल्ले दारुडे यावर नियंत्रण ठेवावे, वेड्या वाकड्या जागेत विभागलेल्या या बस स्थानकाचा राज्य परिवहन महामंडळाने कायापालट करावा व प्रवाशांची या त्रासातून मुक्तता करावी.